K’NDOJ PËR TY NORA KELMENDIT
Në Tamaren e Kelmendit
Lindi trimja sokoleshë,
Si bajrak në kry t’kuvendit
N’ato Alpo si mbretneshë.
N’kry t’betejës kjo malsore
Me trimni e me urti,
Forca saj si çik’ arbnore
Nëpër shtigje në Malsi.
Kush po prin si zonja vendit?
Kush po i del për zot vatanit?
Si burrnesh Nora Kelmendit,
Me presen e jataganit.
N’kry të luftës heroike
Printe Nora me duhi,
Nëpër shkrepa si kreshnike
Përball Pashës me ushtri.
Si burrnesh ishte betu
Edhe fjalen kishte dhanë,
N’çadër t’turkut për me shku
Gjallë Vuçë Pashen mos me lanë.
Nora e bukur si zanë mali
S’donte t’ishte gruja tij,
Nderin Nora nuk ja fali
Nxori thiken me shpejtsi.
Ty o Pash, o Osmanlli
Ju drejtu Nora me fjalë,
Po t’martoj në dhe të zi
N’kët tokë shpirti ty me t’dalë.
Ramazan Çeka
