PO MË THRRET ME K’NDU LAHUTA
Moj lahuta e Malsisë
K’ndoji kanget e shqiptarisë
Në refren bashkë me bilbilin
Thirre Mujon e Halilin
Zanin tand du me ta ndi
Kadal pluhnin me ta fshi
Me e k’ndu nji kangë me ty
N’sofra tona me ndej n’kry
Ty Malsia t’ka dhanë hakun
N’emër tand kena falë gjakun
Gjithmon’ kullat t’kan pa n’sy
E kanë lidh besen me ty
Kangen tande kurr’ s’e ndale
Ndër kuvende e festivale
Traditen që ka Shqiptari
Me ty bashkë k’ndon lahutari
Zani jot bekim i Zotit
Me simbol të Kastriotit
Me nji tel histori bane
Na jetojm’ me kangen tande
Ramazan Çeka
